அசீரணம், வயிற்று பொருமல் நீக்கும் சோம்பு

சோம்பு சமையலில் நறுமணத்திற்க்காக சேர்க்கப்படுகிறது. இதில் எண்ணற்ற மருத்துவ நன்மை உள்ளது. சோம்புவில் நோய் எதிர்ப்பு, தாது பொருட்கள் போன்றவை மிகுந்து காணப்படுகிறது.

யோனிநோய் குன்ம முரூட்சைமந் தம்பொருமல்
பேனமுறு காசம் பிலீ கமிரைப் – பீனவுரை
சேர்க்கின்ற வாதமும்போஞ் சீர்பெரிய சீரகத்தான்
மூக்குநோ யில்லை மொழி!

குணம்

பெருஞ்சீரகம் என்று அழைக்கப்படும் சோம்பினால் வயிற்று வலி, சுரம், அசீரணம், வயிற்றுப்பிசம், நுரைத்த கப இருமல், அதி தும்மல் பீனிசம் இவைகள் நீங்கும்.

பயன்கள்

• இதை இடித்து சூரணம் செய்து ஒரு வேளைக்கு 5 கிராம் வீதம் சர்க்கரை சேர்த்து தினம் 3 வேளை கொடுக்க அசீரணம், வயிற்று பொருமல், வயிற்று வலி முதலியவற்றை நீக்கி மலத்தையும் போக்கும்.
• சோம்புவில் இரும்புச்சத்து நிறைந்திருப்பதால் உடலில் இரத்த ஓட்டம் சீராகிறது. உயிர் அணுக்கள் உற்பத்திக்கும், செரிமானத்திற்கும் இது உதவுகிறது.
• இதை தண்ணீரில் போட்டு கொதிக்க வைத்து வடிகட்டி அந்நீரை குடிக்க பித்தத்தை தணிக்கும், மேலும் உணவை செரிக்க வைக்கும்.’
• பசி ஏற்படாதவர்கள் சோம்பை தனியாக மென்று சாப்பிட்டால் உடனே பசியை தூண்டும்.
• இது குழந்தைகளின் வயிற்றுப்போக்கு, வயிற்று வலி, உப்புசம் ஆகியவற்றை நீக்குகிறது.